معانا عابر سبيل · 6mo
ازيك يا سيد يحيى
ازاي انسانة عندها ٢٧ سنة تبدأ تكون شخصيتها و تعرف هي مش عايزة ايه و عايزة ايه ، هتقول طب و هي كانت فين السنين اللي فاتت ديه كلها ، هقولك مكون شخصيتها الأساسي هي الحزن و الأسى على ناس رحلوا من العالم ده ،سنين اتسحبت منها من غير ما تحس ، عارفة ان الألم جزء من التجربة بس هو مش التجربة كلها
و حاجة كمان عايزة اسأل عليها او اتناقش فيها ، إزاي نطلع من عباءة أهلنا، مش بالمعنى الوحش بس اللي هو خلاص كبرنا و قراراتنا نقدر ناخدها لوحدنا، مقارنة بغيري حاسة اني ميتة على وش الحياة علشان لسة في عباءة اهلي ، عارف لما يجيلك احساس انك عايز تنطلق للحياة و تكتشفها بس مقيد و مش عايز تتكلم معاهم علشان ميزعلوش، مش عارفة احس باستقلاليتي بالرغم اني مستقلة ماديا عنهم بس نفسيا و حياتيا لا
هو ده شعور طبيعي و لا ده جحود بالوالدين؟
سؤالك تقيل قوي سامحيني كل ما بقراه مبعرفش ممكن اقول إيه
الرغبة في الاستقلال النفسي مش جخود طبعًا، ممكن يكون مسار طبيعي أحيانًا
الجحود كما أفهمه نكران الفضل .. الإساءة .. قطع الرحم
لكن إن الإنسان ينضج فينفصل ده سنة الحياة والطبيعة
معنديش استغراب لسنك اللي بالتأكيد وصل دلوقتي 28 عادي
ومعنديش نصيحة عامة سؤالك أكبر مني لكن أقدر أقولك حاجات بسيطة
- "لكيلا تأسوا على ما فاتكم" .. غالبًا عندك ضعفين عمرك تاني تقدري تعملي فيهم كل حاجة .. احتكي بالعالم فورًا وفكك من التفكير النظري .. مهما كان تنظيرك وتخطيطك كويس لما هتحتكي هتبني قرارات مختلفة
- مش طبيعي تعرفي انتي عايزة إيه بسهولة .. لكن سهل تعرفي انتي مش عايزة إيه .. ركزي وشوفي إيه مش مناسب ليكي وإيه مش بتطيقيه وإيه بيستنزف طاقتك .. وده هيقلل دايرة بحثنا شوية
- ابدأي بالصغير مش الكبير .. لما بتدوري على مشروع حياة كبير .. انتي محتاجة حاجات بسيطة تتعمل انهاردة .. والأسبوع ده .. حاجات زي قراءات .. أنشطة .. ناس تقابليهم .. أماكن تزوريها الإنجازات الصغيرة هتديكي ثقة وتبني أصدقاء وتجربة 4.الاستقلال المادي إنجاز ممتاز .. لكن الاستقلال النفسي مهم .. الأهل بيخلطوا الحماية بالوصاية
- راعي مشاعرهم ومتلغيش كيانك .. بعض قراراتك هتزعجهم .. اعرفي ده واستعدي ليه .. الانزعاج مش دايما الناس بتعرف تتعامل معاه .. قد يكون ردود أفعالهم غلط .. لكن حطي لنفسك من الأول كود أخلاقي تلزمي نفسك بيه لو كودك مش هيكون أهلك .. ولو حاجة انتي مش عايزاها 100% .. تنازلي واكسبي فرصة تعندي في حاجة أهم المرة الجية
- افتكري إن البر هو الإحسان .. الاحترام .. الكلمة الطيبة .. لكن حاولي برضو تعرفي إن الأهل ليهم حكمة .. افتحي باب حريتك في اتخاذ قراراتك .. لكن اللي ملهوش كبير بيشتريله كبير .. وانتي أهلك على وش الدنيا .. اكبريلهم قد ما تقدري
بالتوفيق عمومًا .. وآسف على إجابة متأخرة 6 شهور
