مش شايف المشكلة هنا في قلة الوعي .. واضح إنك عارفة إنها فكرة زائفة
لكن فيه فرق دايما بين اللي بندركه بعقلنا واللي بنستجيب بيه لشعورنا
الشعور مش بيسمع صوت المنطق لأن مراكز الخطر في الدماغ بتتعامل مع نجاح الآخرين إنه تهديد وجودي لمكانتك واستحقاقك

مشاعرك جية من فكرة إنه القيمة في العالم محدودة وبالرقم كده بتتصرف .. لو حد نجح ياخد جزء منها فهو اقتطع من رصيدك .. ده محتاج حقنتين دراسة لاسم الله الرحمن الرحيم واسم الله الكريم .. لأن الدنيا مش بتشتغل كده

قل لو أنتم تملكون خزائن رحمة ربي إذن لأمسكتم خشية الإنفاق وكان الإنسان قتورًا

شعورك إن مجهودك ملهوش لازمة ده برضو ديفينسيف ميكانيزم. عقلك بيحس بمرارة وصعوبة في (المحاولة الفاشلة حتى لو فشلها محتمل) أسوأ من ألم (الاستسلام) ودي كمان فكرة محتاجة تحليها .. لأنه المحاولة الفاشلة عمرها عمرها مهما عمل إحباطها ما هتكون أسوأ شعوريًا من الفشل والقعود .. عقلك الباطن عايز يرتاح .. بس بيشل إرادتك

آخر فكرة واضحة هي المقارنات .. المقارنة مش شيء وحش
بس محتاجين نحولها لأننا نقول (فكرة فلان ذكية، إزاي أخلي فكرتي أذكى) مش (فكرة فلان ذكية، يبقى أنا مش شخص كويس ومستحقش حاجة"
أكيد انتي عارفة كويس إن جوهرك وأهليتك كإنسانة مش بتتحدد بكم إنجازاتك لكن برحلتك اللي بتخوضيها وقابليتك كل يوم إنك تتعلمي جديد.

نصيحة عامة
1. متقاوميش الشعور ده لما يظهر فورًا .. لازم الشعور ده ياخد وقته وتتعايشي معاه .. ولو حاولتي تطرديه هتستنزفي نفسك (هتحسي بالسوء لأنك حاسة بالسوء) .. لما يهجم عليكي .. اعترفي بوجوده وبصيله بوعي .. أنا دلوقتي شغال عندي نمط مقارنة غلط .. وهو مجرد شعور مش فكرة أنا مؤمنة بيها .. بس أنا حاساها .. وده شيء هياخد وقته وهيعدي .. ادي للشعور مساحة يمر بسلام متتفاوضيش معاه

1. متستنيش الشعور ده يختفي عشان ترجعي تحاولي .. احنا مش بنحاول نمنعه زي ما اتفقنا .. احنا مهتمين بس إننا نمنعه إنه يتحكم في تصرفاتك .. ربنا مش هيحاسبك عليه طول ما هو في قلبك .. فنعمل إيه؟ نخليه في قلبنا ونتحرك وناخد خطوة صغيرة جدًا في حاجة منتجة مع وجود الإحساس .. صعبة .. أنا عارف .. بس مهمة

2. لما حد يقول حاجة كويسة .. دربي نفسك على ذكر "ما شاء الله" قوليه كذا مرة وحاولي تتأملي معناه في نفسك كده
   ما .. شاء .. الله .. كان
   وفكري في إنه ده فضل من ربنا .. في اللحظة دي والسياق ده .. مش تفضيل لربنا للشخص ده عليكي في المطلق
   بالعكس بصي للمنحة في إنه بعت الشخص ده يعمل حاجة مميزة قدامك عشان يحفزك تعملي زيه .. أو تستوحي حاجة أذكى من اللي بيقوله
   وبالمناسبة ده تكنيك رابع مهم .. خدي أي فكرة ذكية تسمعيها من أي حد وحاولي تفكيها وتركبيها كذا مرة وتوصلي لحاجة أعلى منها أو أذكى عليها .. لو نجحتي وخدتي الإشادة هتتبسطي قوي وهتثقي في نفسك

ربنا معاكي
وآسف على التأخير ظاهرلي إن ده سؤال اتسألي من 9 شهور
انتي لسة عايشة؟؟